دحيم وحياة الكسافة

حياكم الله
لاحد يفهم القصة غلط ياحقين الفواز
.
.
هذي قصتن صارت بسنتن من السنين على واحدن ابوه عربجي وامه عربجيه واخوانه وخواته عرابجه اسمه دحيم طلع من بطن امه خاطن شنبه من زود الهياط اللي باهله يعني مرحلة طفوله ذي يسمع بها اذا حضر عرس فيه ناس مثقفين والا هو من طلعته يمهدونه بجلال صلاة امه والى بغت تصلي مسكت طرف الجلال وهو ممهودن به وتلته بأقوى ماعنده وهو مسيكين يحلفون انه مرتن متعلقن بالمروحه ومرتن لازقن بالتلفزيون ومن زود الروعه مايصيح يقعد يغامض بعيونه اخوانه اذا بغو يطلعون يتصيدون يدوّرون الحصاني وياكلونهن جوهم مخيس يلاحقون الضببه ويذبحونهن ماهمب مقتنعين انهن ضببه يحسبون الضب برعصي متغذي من هالربيع يدورون بالنفود الصقنقور وياكلونه يعني حياتهم كلها معكوسه يذبحون الضببه ويذبونهن وياكلون الصقنقور اذا صارت مضاربه لهم مع احد مايطلعون الا بصواطير وخواتهم مافيهن مضاهر انوثه ويحلقن شنباتهن لين طلعن لهن شنبات تخيل جسم حرمه ولها شنب وتحلق راسها رقم ثلاثه مره من المرات اخذين معهم دحيم وهو صغيّر ومعلّقينه بشجره وشابين فيها يبي يشوفون هو يحترق والا ماهوب قابل للأشتعال ابوهم اذا نجحو هداياهم كلها ياعجرا يا شوزن وبدال السياكل يركبون حمير الله يكرمكم <--- والله ياني اخلاق احس اني مؤدب اكرّم القاري والله لو اني بالادبي على نياتي والا القسم اللي يشرفون عليهم جداويه ومربوش وطقتهم ماضنيت يبي يحترمون الواحد لو يكتب فيهم معلقه


دحيم وده يصير مثل اخوانه واهله عربجي بس مشكلته انه ذروق وعجزو ابوه واخوانه كل مابغو يخلونه زاحف اغمى عليه وهو بصراحه يمثل انه يغمى عليه مثل مرتن من المرات جابو لهم تسلب الله يكرم من يقرى وقطعو اذانه ووكلوهن اياه على شان ينغلث وخلوه يلحق دحيم من اول ماقالو للتسلب شيش يشيشونه عليه طاح عليهم وفتح نص عين يبي يشوف وش يسوون غديهم يرحمونه والا يحنون عليه واخر شي سحبوه اخوانه وذبّوه بالشارع وصكو عنه الباب وهذي بداية قصته وكان عمره اربعطعشر سنه يوم طلّعوه طلع التسلب وراه وجا عند خشمه ورفع وحدتن من رجليه ومايحتاج اقول لكم وش سوا على خشم دحيم ولا قال شي من زود الذراق يوم راح التسلب وهو يقوم ويمشي وكان الوقت بين عشوين يعني بين المغرب والعشا لقا له بيت قديم وراح له قال غديني القى احدن يحن علي احسن من اهلي شاف الباب مجافا (مطرّف او مقدّم لغير الناطقين بالسعودي) ودخل والبيت كله مظلم ولافيه الا لمبتن وحده ويدخل غرفه ويلقى بها عجوز تسنها بليس لافتن الغدفه على راسها وطلعتن نص شوشتها بيضا ووجها تسنه شابتن به حريقه .. دحيم تروّع قال السلام عليكم ياخاله وهي تطمر عليه وتعلق برقبته قالت جابك الله جابك الله والله اني جوعانه لي اسبوع ماذقت ادمي وهو يطيح دحيم ماسكته ام الركب ويتنافض يبي يسوي انه مغمى عليه وعجز من اللخمه قال من انتي تكفين لا تاكليني الله يرحم امتس وابوتس خليني والله اني مابي اموت انا منحاشن من الموت وجيت له برجليني العجوز قامت تضحك وصوتها تسنه تنكه طايحتن لها من فوق جبل قالت اتسذب عليك انا عجوزن وحدانيه و لا عندي احدن اسولف معه عيالي خلوني وكلن مجافيني وانا ابيك تصير ولدي وتبرّ فيني وابا اكتب كل حلالي ومالي باسمك لكن بشرط هو يوم سمع كلامها نسى الروعه واكتشف ان فيه طمع قال ابشري والله باللي تبين ياميمتي <--- هالحين صارت اميمته وهو قبل شوي بغت تجيه جلطه بس ابن ادام مايملى عينه الا التراب
قالت شف انا ابيك من الفجر لين المغرب تجمع لي اي كرتون تلقاه بالشارع وتجمع لي كراتين قال بس ؟ ابشري والله بسعدتس وصار على هالحاله كل يوم يجمع لها من هالكراتين وياكل ويشرب وينام عندها بس تعطيه الفلوس بالقطّاره بخيله عليه بس هو تفكيره انه يبي يارثها ويفتك منها ومن اهله شوي شوي صار هو اللي يسوي لها الغدا والعشا والفطور ويوم صارت ماعاد تمشي صار هو اللي يغير لها ويسوي لها كل ماتحتاجه وراحت السنين وبيوم من الايام جا مجمعن كراتين المغرب وهو يجي ويلقاها نايمه ويقومها يبيها تصلي ويناديها يصوت لها ولا ترد عليه درى انها ميّته نادى الناس وجمعهم وقلبه طاير من الفرحه بس يتظاهر قدام الناس بالحزن وجو الجيران وغسلوها وكفنوها ودفنوها يوم قضو تذكر انها ماكتبت له لا ورث ولاهم يحزنون وهو ينهبل ويروح لبيتها يوم اقبل عليها وهو يلقى عند الباب سيارات ويدخل قال من انتم ؟! قالو حنا عيال فلانه قال ايه بس ترى كل حلالها لي هي قايلتن لي قسمن بالله قالو ايه يبلغ اطلع برى بس ضف وجهك لابوك لابو تسلب وهو يطامر ويناقز ويلمس الارض باطراف رجليه ويصيح ويلعنهم ويلعن العجوز ويلعن نفسه على غباه وهم يطردونه ويذكر انه مديون للبقاله حق الحفايظ اللي يشتريهن لها يوم هذرت على شان ماتوصخ على نفسها ويبلش بها حتى انها يوم هذرت طاحت بالتتن من الهستره وصار يشتري لها من هالروثمان لين صارت شفايفها تقل كفرات سيكل من السواد


ويروح لبيتهم ويدخل على اهله يوم شافه ابوه وهو يتفل بوجهه ويصفقه طراق قال توك تذكرنا يادحيم بليس عساه يدحمك الصوح وش تبي قال ابا اموت الله يكنستس من عايله ويكنستس من حاره ويتطامرون اخوانه وخواته كلن يتطلب ابوهم تكفى يازكرت انا اللي بذبحه طلبتك قسمن بالله بحياتي ماقد ذبحت خل بجرب فيه .. وانهبل دحيم وفلخ عقله وصار عربجي بدون مايدري يمشي مفصخ ويطامر ورى بنات المدارس والعيال لين ماعاد احدن صار يروح للمدرسه لين توذو اهله واهل الحاره كلهم منه لين لقوه بحدى العيّر ماسكن بيد قارورة كلونيا واليد الثانية باتكس اثره شاربن كل شي لين مات من القهر وهذي نهاية دحيم المسيكين ..


مايستفاد :
1 - اذا صارو اهلك عرابجه طاوعهم اما تصير عربجي مثلهم والا تموت بعزك بينهم
2 - لاتصدق كل شي ينقال لك ولا تخلي الطمع يغطي على قلبك
3 - وبس