فاجبته بكل فهاوة : والله يا ابوية اذا تبي سلف ترى ما معاي ولا نكلة ( نكلة هي مؤنث نكل وهي العملة المعدنية في امريكا ... .. شي ريدييكلس صراحة
) واذا تبي تتزوج على امي .. اشتري لي قراندي 94 وانا اقنعها << لاحظو اننا رجعنا خمسطعشر سنة
كم مرة اقولك يا ابوية جلست المركازمع الشيبان في العصرية هذي تضرك ما تنفعك ما صدقتني
.. مرة يقولو لك نبي نسافراندونيسيا عشان نحضر مهرجان تلقيح النخل .
. ومرة يقولو لك نبي نركّب قمر اوروبي يقولون انه زين للروماتيز
.. والحين طالعين لي في دراسة والمشكلة اخذين مقلب في نفسهم وتقول بروح( للعيال)
اقولك
.. انا بتعلم اقرى واكتب وهذا قرار نهائي ومافي اي رجعة والحين روح جيب امك من بيت خالك وبعدين نتفاهم
ذهبت الى بيت خالي لاحضار والدتي وآثار الصدمة ما زالت طاعجة وجهي ( ما كان في تامين ضد الغير
) .. واول ما طلعت امي السيارة وانا انظر فيها وانا فاغر فمي
يوممه
ااببـــ ... اببـــ ... يدرســـ ... يبيــــ ... جاننـ.... ي ..
امي وشفيك انت تقطّع .
.. طلع لسانك وطقه في الطارة زي ما تسوي في الشريط اذا خرب
استجمعت قواي وما بقى من وجهي اللي راح حب من محش امي وقلت لها
ابوي جاني اليوم وقال انه يبي يدرس
اطرقت امي هنيهةً .. ثم انفجرت بالضحك وقالت
الله يمتحن ابليسك يا طعطوعي
.. تحسب انها كل مرة بتمشي علي زي ما مشيت علي يوم تقول لي ان المدرسة مسوين زيارة للطلاب في مصر عشان تبادل الثقافات ومشاهدة الاهرام
يومه ترى من جد كانت موجودة .. لا تحسبوني انصب عليكم
اقول بس ودني البيت ولا تكتر غلبة
وعندما وصلنا البيت وسّلمت الوالدة على الوالد وهي في اواخر مراحل الضحك وتقول للوالد
شايف ولدك الخبل يقول انك تبي تدرس .. وهي ما زالت في حال الضحك
وابي ينظر اليها وقد علت محياه ملامح الامتعاض وقال لها
ايوة ابي ادرس عندك مانع
... واذا منتو موافقين ترى بتزوج مدرّسة واخليها هي اللي تدرّسني
بدات ضحكات امي تخف شيئا
فشيئا فشيئا.. وقامت بنزع وجه الضحك وتركيب وجه خالد مسعد وهو متعور من اصابة
يا ابو خالد ( خالد اكبر اخواني ) تعوذ من الشيطان
..واستطردت في الكلام بعد ان قامت بالتخصر .. وش تبي الناس يقولون علينا .
.... يا ابو خالد ترى انت جد واحفادك على وجه عرس .. مالنا في ذي الطلايب
ايوة يا ابوية وامي صادقة .. انت الحمد لله ما قصرت ضحيت بكل شي عندك وربيت رجال
رغم ان زمانكم كان زمان الجوع وقلة اكل العيش لكن الحمد لله عيالك اللي دكتور وااللي مهندس واللي مدرّس وكلنا بخير بس انا اللي طلعت داشر عشان لا احد ينظلكم والا يصككم بعين
ابوي وامي مع بعض وبصوت واحد : انكتم انت
ابوي : انا مالي شغل في الناس انا لي في نفسي ابي اتعلم اقرى قران
كانت هذه الكلمة كفيلة بان تجعل امي تستسلم للامر الواقع وبدون اي فرفصة .. ولم تملك الا الدعاء لوالدي بالتوفيق
وبدا المشوار التعليمي للوالد بتسجيله في مدرسة لمحو االامية وقد طلب الوالد ان يتم تسجيله في الفترة الصباحية
قلت له لا يابوي ما ينفع .. من اللي يوديك ويجيبك وانا بكون في المدرسة
قال لي كل تبن واسكت وتبي توصلني وتودني وتجيبني وانت ما تشوف الدرب
يا ابوية وش تبييني اقول للمدير؟؟ عندنا مدارس
.. وهو عارف اني اصغر عيالك .. يعني تبيه يفصلني
قال خلاص .. امري لله سجلوني مسائي .. بس بتروح علي جلسة المركاز في العصرية << وش دحدر بنا غيرها
وتم تسجيل الوالد في الفترة المسائية وبدات المرحلة الدراسية وبدات طلبات الوالد تهل علينا
ساعة يبي دفتر ابو اربعين وجه لوجه ومقلمة .
.. وساعة يبي شنطة ومسطرة ...وساعة يبي تشكيل شمعية
<< يا قدمك يا شيخ
كنت انا المسؤول عن تدريس الوالد .( فيس اثنين متمغطين في الصالة ورافعين رجولهم فوق ). ومخصص له ساعة عشان ادرّسه اااالفون بااااءون تااءون نصها تروح تهميز رجول .
. والمشكلة انه الوالد اللي يحفظه كان بالع حرف كامل من حروف الهجاء وهو حرف ( الذال ) لا يمكن ينطقه غير ( دال )
ولما كنت ادرّسه قران ما يقول اللذين انعمت عليهم .. يقول اللدين انعمت عليهم
اقوم اعصب واقول له اذا ما نطقتها صح ما راح اخليك تكمل
ويجيني ذاك الكف اللي خلى جغودي زي طبقة الفراولة على التشيز كيك << الجوع كافر
اقوله طيب خلاص المرة دي راح امشيها لك
<< ابد ما يعاني من نفس مشكلة حرف الذال زي ابوه
وتجي الوالدة ومعاها كاسة الحليب بالعسل للوالد... طبعا ساحبة علي ولا كاني موجود
وتقوله اشرب الحليب عشان تقدر تركز وانت تحل الواجب
<< مصفّي النية
ويوم من الايام جاني الوالد وقال لي خذ هالرقم دق لي عليه
رقم مين دا يا ابوية ... لا يكون طايح لك في وحدة(ن) دميرة ثم تضيّع علومك
تدق الرقم والا اخلي شنبك اللي كنّه طارة سيكل 26 مكان حواجبك
هذا رقم الطنعوزي زميلي في الفصل ابغى اعرف وش اسالة الواجب
الوالد : الووو هلا طنعوزي شخبارك .. وش اسالة الواجب اللي علينا ابي الولد يكتبها
ثم اومئ اليّ بيده قائلا : اكتب يا واد
السؤال الاول .. من الذي اخترع نغمة الاتصال مشغول في التلفون طوط طوط طوط
السؤال التاني ... من الذي اخترع صوت السفتي اللي في الدوريات
السؤال الثالث .. اذا انكسرت قزازة في برج المملكة شلون يغيرونها
انا : ..
.
يا ابوية هذا من جد زميلك ؟
والله هو زميلي بس ما ادري وش هالاسئلة ما اخذناها في الدرس
لا يا ابوية خلاص ما راح اخليك تروح هذي المدرسة دام هالاشكال فيها .. انت انسان طيب وعلى نياتك يعني من المسجد للبيت ومن البيت للمسجد .. اسالني عنها دي الاشكال
خلاص يا ابوية انت مو تبي تقرى قران ؟.. اوديك مدرسة تحفيظ قران وريح بالنا بلا طنعوزي بلا مطعم غوزي
وتم تسجيل الوالد في مدرسة تحفيظ القران وكانت اسعد ايام حياته
ويوم من الايام وانا اللي اشوف ابوي متغير حاله واساله وشفيك يا ابوية عسى ما شر
ابد والله يا طع بس فيني مغص مدري من وين جاي
سلامتك يا ابوية من متى معاك المغص
والله اول ما قالو لنا بكرة عندكم اختبار طق فيني ذا المغص
لا يا ابوية بكرة تتعود عليه لسة ما شفت شي
... بس قول لي ايش الاختبار
تسميع سورة الضحى
طيب انت حافظها ؟
حافظها بس مو ذاك الزود
وجلست اراجع مع الوالد السورة والا ماش الوالد ماهناش حفظ .... وجلست ذيك الليلة احاتي ابوي واختباره ...وتجيني ذيك الفكرة اللي خلّت عشرين لمبة كوع تولع فوق راسي تقول في عرس
.. وانا اللي انقز للوالد واساله
ابوية .. انت الساعه كم اختبارك
والله انا ترتيبي الاخير يعني اذا جاني الدور تقريبا في نص صلاة المغرب ... خير ليه تسال
قلت له لا ولا شي بكرة تعرف ... بس تابع صلاة المغرب واتذكرني
ومن الغد انقز لامام المسجد اللي جنب مدرسة الوالد .. وانا تعلومحياي سيماء الصلاح والهداية واطلب منه طلبا في قمة الادب ..واقول له : يا شيخ انا احب سورة الضحى ممكن تقراها لنا في الركعة الاولى فاجابني : جزاك الله خير يا ولدي والله يكثر من امثالك << الله يسعده والله انه على نياته
وفعلا بعد الصلاة ذهبت لانتظار الوالد لنعود الى البيت
واذا الوالد جايني ماشي مليون
الله لا يبارك في ابليسك من ولد لعنبو دار ابليسكم وش ذا البرشمة اللي ما تطري على احد... انا وانا ابوك ما سلمت منكم وش خليتو في دراستكم
طبعا اكلت لي كم طراق بس بعدين قال لي جبتها صح يا واد
والحمد لله استمر الوالد في حفظ القران رغم عدم تعلمه الكتابة والقراة ولكن اصراره على الهدف الاسمى وتفانيه في حفظ كتاب الله جعل صعاب الامور تتذلل امام عينيه وكان توفيق الله هو المرافق لوالدي في كل خطواته
وفجاة
اسمع صوت الباب ينفتح والا الوالد في وجهي
دوبك جااي يا قليل الدين .
..يا داشر
.. يااا حشرة الليل .
... ياااا ..
..
الشايب لا يمكن يرضى عني مهما سويت
.. بس برضو فدى تراب رجوله
من ما مضى كانت احداث في ما مضى ولكنها لا تخلو من واقع رغم البهارات ...فهذا الوالد العزيز يحفظ الان من كتاب الله خمسة اجزاء حفظه الله بحفظه ورعاه
آبــائــنا الاعزاء .. رغم ان وقتكم كان من اشد واصعب الاوقات الا انكم استثمرتم في ابنائكم
ليكونو لكم عونا وعطاء .. بس والله لو انكم شارين اراضي في الشمال بتراب الفلوس كان الحين اصرف لكم من خششنا
موضوع: آبــائنا في الداخـــل ... 
الأحد يناير 24, 2010 9:29 pm
